Kommuneplanen sin samfunnsdel

No er kommuneplanen sin samfunnsdel klar for å bli lagt ut til offentleg ettersyn. Det er Fellesnemnda som gjer det i møte 3 april. Det har vore mange grupper involvert i arbeidet. Takk til alle som har vore med i arbeidet.

Nærmar vi oss ei ny båtrute og eit pilotprosjekt med hydrogenbåt?

Denne veka kom det ei gladmelding i form av eit vedtak i fylket sitt hovudutval for samferdsle. Både administrasjon og folkevalde har arbeidd med å få til eit samarbeid om eit betre båtsamband mellom byane. Saka er todelt; ei ny permanent rute som også stettar krav til lågare utslepp. Det andre handlar om ei mellombels rute som skal starte opp mens vi ventar på ei ny ordning. Når det gjeld den første delen må arbeidet koplast opp mot fylket som er bestillar av slike ruter. Då er det kjekt å registrere at eit samrøystes samferdsleutval seier at; Sogn og Fjordane fylkeskommune lyser ut anbodsruta Florø-Måløy- evt Selje t/r som et nullutslipps/ lågutsleppsanbod for hurtigbåtar. I tillegg seier utvalet: Ruta må ha ein frekvens som gjer arbeidspendling mellom Florø, ytre Bremanger og Vågsøy (evt. Selje) enklare enn i dag, både på dag- og kveldstid.

Så var det møte i formannskapet i Bremanger i går. Kinn-prosjektet har spurt dei om å bli med å finansiere den andre delen; ei mellombels rute mens vi ventar på den nye. Frå før har både Vågsøy og Flora tatt høgde for dette i budsjetta sine. Formannskapet i Bremanger er positive til tiltaket og ber om at kommunestyret får opp ei sak om å vere med på å støtte oppretting av ny båtrute. Dette er flott og eg tenker at dersom kommunestyret i Bremanger følgjer opp, vil dette vere ei stadfesting på at dei ønskjer eit godt samarbeid med Kinn og dei andre kommunane på kysten – til beste for oss alle. Plutseleg fekk eg lyst å sitere Fridtjof Urdal si grunngjeving for at det bur folk her ute på kysten, på alle nakkar og berg. "Jau, det er berre på pur faen".

IT – på sporet

Tysdag var det samling for alle IT-tilsette i Flora, Vågsøy og Nordfjordnett. Det er mange saker til drøfting. Formelle saker som Nordfjordnett si organisasjonsform og meir driftsprega spørsmål om teknisk infrastruktur, tilgangar, programvare og liknande. Den vikitgaste oppgåva å løyse er likevel i høve dei tilsette. Flora har fem tilsette i si IT-avdeling, Vågsøy ein. Kva arbeidsoppgåver skal desse ha når Kinn trer inn som fullverdig medlem i det samarbeidet med dei andre Nordfjord-kommunane. Vi har satt ned fleire arbeidsgrupper som gjennom ulike tema skal kome fram til nokre av svara. Så er det jo slik at noko må vere på plass til årsskiftet, noko kan vente. Vi må skilje og arbeide deretter. Vi opplevde tilsette i alle tre organisasjonane som positivt innstilt til å gå laus på arbeidet, og som ser fram til å få svar på mange av dei spørsmåla som dei sjølve stiller seg i ein slik endringsprosess.

Ny kommunelov

Onsdag var det kurs i den nye kommunelova. Kinn var godt representert både med folkevalde og tilsette. Den nye lova legg føringar for både den politiske organiseringa, sakshandsaming og ikkje minst økonomstyringa i ein kommune. Difor var det kan hende spesielt nyttig at arbeidsgruppa som skal tilrå politisk organisering, møtereglement, delegeringsreglement og godtgjersle til dei folkevalde, var representert med Jan Henrik Nygård, Hanne Husebø Kristensen og Morten Hagen. Arbeidsgruppa følgjer opp i møte i neste veke.

Valkampen er i gang

Onsdagskvelden var det årsmøte i Flora industri og næringsforeining. Fem lokalparti i Nye Kinn stilte og fortalde om korleis dei vil legge til rette for næringsutvikling i den nye kommunen. Eg registrerte med glede at kandidatane nytta meir vi enn dei og oss, meir Kinn enn Flora og Vågsøy. Det syns eg lovar godt for valkampen som sikkert blir intensivert meir i tida som kjem.

Neste veke

Møte i ASG måndag. Same dag har arbeidsgruppa for politisk organisering møte. Tysdag er det møte med Nordfjordnett. Onsdagen går med til å arbeide med nytt delegeringsreglement, og arbeidsgruppene for hamn og næring og interkommunale samarbeid møtast. Fredag møter eg dei andre rådmennene i Nordfjord.

God helg – og lukke til i det vidare arbeidet med Nye Kinn kommune!